Alice im Wunderland

Alice im Wunderland (ursprünglig hochdütsch Alices Abenteuer im Wunderland; dr änglisch Originaalditel: Alice’s Adventures in Wonderland) isch e Chinderbuech vom britischen Schriftsteller Lewis Carroll, wo 1865 erschiine isch.

Die fikzionaali Wält vo dr Alice im Wunderland, spiilt in ere Art und Wiis mit dr Logik, dass d Gschicht bi Chinder wie au bi Erwaggsene, bsunders bi Mathematiker, beliebt isch. Es het din e Hufe satiirischi Aaspiilige – nit nume uf persöönligi Fründ und Bekannti vom Carroll, sondern au uf d Schuellekzioone, wo d Chinder im Ängland vo sällere Zit häi müesse uswändig leere. Mäistens luegt mä die Gschicht und iiri Fortsetzig Alice hinter den Spiegeln (im Originaal: Through the Looking-Glass and What Alice Found There) as en Äihäit aa. D Büecher si au dur d Illustrazioone vom britische Zäichner John Tenniel in den erste Usgoobe bekannt worde.